١: يعني إيه فريلانس؟

باختصار الفريلانس ترجمته هو العمل الحر ودا معناه انك تكون عندك الحرية المطلقة تشتغل ايه وفين وامتى وازاي، من الآخر انت رئيس جمهورية نفسك

يعني مش محتاج انك تروح الشركة وتتقيد بمواعيد عمل معينة وتلبس لبس معين وتشتغل شغل معين أو تسمع لكلام مدير معين 

وبرضو مش محتاج انك تكون عندك شهادة معينة ولا انك تعدي انترفيو معين 

٢: ليه ابقى فريلانسر ووإيه مميزاته؟

• تقدر تشتغل براحتك ومن أي مكان انت عايزه، من البيت من المكتب من الجنينة أو حتى وانت قاعد في كوفي شوب
• كثرة فرص العمل ومجالاته ومش هتبقى مقيد بعملاء من مدينتك أو محافظتك (العالم كله بين إيديك)
• سهولة التواصل مع العملاء بتوعك لأنك هتكلمهم عبر الانترنت 
• هتقدر تكسب مبالغ مالية كبيرة وخصوصا لو اخترت تشتغل في مجال انت بتحبه 
• هتوفر الوقت والمجهود اللي ممكن تبذله وانت في المواصلات رايح الشغل وراجع منه 
• هتبقى مسؤول عن نفسك ورئيس جمهورية نفسك، انت اللي تحدد تشتغل امتى وتريح إمتى، عايز تشتغل ساعة ماشي، عايز تشتغل ١٦ ساعة برضو ماشي
• انك تكون مبدع!! آه العمل كفريلانس هيخليك تختار المجال اللي تحبه وكمان ساعتها مش هيكون فيه روتين معين انت ماشي عليه والروتين بيقتل الإبداع لكن الفريلانس بيطور من مهاراتك الشخصية والإبداعية لأن مفيش حد بيتحكم في قراراتك أو طريقة تنفيذك للعمل
• الفريلانس هيساعدك على التطور والوصول للعالمية، الفريلانس بيزيد من فرص انتشارك لأنه بيوسع دايرة أعمالك ومعارفك وزباينك لأنه زي ما قلنا بيديك الفرصة يكون ليك عملاء من كل أنحاء العالم
• الأمن والاستقرار الوظيفي، انت ممكن تترفد من الوظيفة اللي انت فيها لأي سبب من الأسباب أو انك تعزل لمكان تاني وتضطر تسيب الشغل لكن الفريلانس معاك في جيبك لفين هتروح، الفريلانس هيخليك انت المسؤول عن نفسك وانت اللي بتراقب على شغلك وعشان انت عندك الخبرة والمهارة فا مش هتفقد شغلك أبدا، لا دا انت هتحصل على عملاء جدد باستمرار
• هتقدر تتحكم في الوظائف وكمان تختار عملائك، لو اشتغلت عند حد فا انت مش بتختار الناس اللي بتشتغل معاهم سوواء كانوا زملاء عمل أو عملاء وممكن تلاقي نفسك بتتعامل مع ناس مش كويسة لكن في الفريلانس انت بتشتغل لحسابك وتختار مين اللي تتعامل معاهم وايه الوظايف اللي تقبلها ومتقبلهاش ولم مش عاجبك عميل معين ممكن بكل بساطة تعتذر عن إتمام العمل 
• الفلوس، ايوه الفلوووووووس، ودا طبيعي جدا انك تفكر في العائد المادي اللي جاي من خلال الفريلانس، باختصار متوسط دخل الفريلانس بيكون ضعفين او ٣ أضعاف موظف بدوام كامل في شركة معينة وطبعا الدخل دا بيزيد بازدياد مهاراتك وسمعتك وعملائك.